الاول كدا خلينا نعرف كلمة Fidget spinner
اولاً يعني ايه Fidget ؟
انا معرفش ايه ترجمتها بس على Google Translate ترجمتها هي تململ... كلمة غريبة شوية صح ؟
يعني ايه تململ بقى ؟
يعني انك تعمل حركة صغيرة بأيدك او رجلك او صوابعك لما تكون متوتر او متعصب
و كلمة Spinner معناها انها بتلف بشكل دايرة...
ف الفترة الاخيرة دي ظهرت الـFidget Spinner و ف وقت قليل جداً بقت مشهورة عالمياً و كل الناس جابت واحدة الي لسا مجابش واحدة نفسو يجيب واحدة
طب ليه الـFidget Spinner انتشرت بسرعة كدا و ليه بقى في ناس كتير مهووسة بيها ؟
طبعاً كلنا بنتململ (ماتستغربش من الكلمة), عادتاً بشكل تلقائي سواء عن طريق انك تلعب ف شعرك او تلعب ف هدومك او بالقلم او بأي حاجة ف ايدك او قريبة منك
و الـFidget Spinner هي مجرد لعبة ممكن تلعب بيها لو انت متعصب او متوتر (تتململ يعني)
هي شكلها شبه المروحة مع 3 رؤوس للمروحة دي
(صورة توضيحية لشكل الـFidget Spinner)
صورة توضيحية لشكل اـFidget Spinner و هي بتلف
و في اشكال و تصميمات تانية كتير ليها
و عموماً مش شكلها اختراع مهم او معقد مثلاً علشان تبقى بالأهمية دي
على الرغم من كدا سعرها 15$ على Amazon
هي اه مختلفة عن اي لعبة تخفيف توتر تانية بس مش هو ده سبب سعرها, ولا بسبب تكليفات صناعتها
بعض الناس بيقولو ان ليها فوائد صحية
ايه فوائدها الصحية ؟
الـFidget Spinner ليها فوائد صحية زي انها بتخفف التوتر و الضغط و بتريح الاعصاب
ازاي ؟
هو مفيش دلائل علمية مثبتة على الكلام ده و كلها نظريات و افكار
1. انك لما تلعب بحاجة زي كدا فا ممكن ده يشغلك و ياخد مساحة كبيرة من مخك و الي هيخليك متفكرش ف افكار عشوائية او تشغل تفكيرك بأفكار ممكن تشتت تفكيرك.
تخيل مخك ده بيت و في عيلة عايشة ف البيت ده مكونة من أب, ام و ابن
طبعاً الأب و الأم مسؤولين عن اتخاذ القرارات و هما المفروض بيعملو كل المهام ف البيت ده
تخيل بقى الأبن معندوش العاب يلعب بيها او معندوش اي حاجة تشغلو, هيفضل يشتت الأب و الأم عن مهماتهم و مش هيعرفو ياخدو اي قرارات او ياخدو قرارات غلط
في كتاب اسمه Fidget to focus(تململ علشان تركز) للكاتب Ronald Rotz و Sarah D. Wright بيشرحو فيه ازاي اللعب بحاجة زي كدا ممكن يساعدك تتخلص من التوتر و الضغط العصبي
و اللعب بحاجة زي كدا ممكن يبعد عنك الافكار الي بتشتت تفكيرك و بتشغلك عن التركيز على الحاجة الاساسية الي انت المفروض بتعملها
مثلاً لما تبقى قاعد بتذاكر و تبدأ تفكر ف افكار زي.. كيف بدأ الخلق ؟.. هي الكراش ليه مش بتحبني ؟.. هو أحمد احسن منيّ ف ايه ؟.. هي مُني فاروق حلوه كدا ازاي؟.. هو الاكل النهاردة ايه ؟
2.ان حركه جسمك هي اصلاً جزء من تفكيريك وتعبيرك....يعني مثلا انك تكتب رسالة طويلة او ايميل او انك تتكلم ف مؤتمر عالمي كبير عن انجازتك العظيمة الي عملتها السنة دي، تفتكر هتعرف تعمل كل ده وانت واقف مكانك منغير ما تتحرك خالص ؟
تخيل كدا... هيبقي شكلك مريب و انت واقف و بتتكلم بس بدون اي حركه او تعبير
بعض الدراسات اظهرت ان التململ ممكن يساعدك في الانشطه الذهنية كالانتباه والتذكر والتفكير...يعني مثلاً انك تكون بتفكر في حاجه و تلاقي نفسك قاعد تكتب او تشخبط بالقلم على ورقة و ده فعلاً بيساعدك على التفكير و التركيز
3.انها زي "الطقوس" اللي بتتمارس يومياً زي "اليوجا" مثلاً وبتساعدك علي تنمية قدرة التنبوء والتآلف مع الحياه اللي حواليك ودا يعتبر من الحاجات اللي غايبه الي حداً ما من علي ارض الواقع في وقتنا الحالي وهي عدم التآلف مع الجو الخارجي وعدم القدره في التعامل.....وانها في كل الاحوال بتساعد علي التركيز وهدوء الاعصاب وانك تتحكم فيها
وان الـ (Fidget spinner) زي الضغط علي كرة التوتر او الضغط علي قلم او ما شابه
بتساعدك تتحكم في اعصابك وبتقلل من التوتر وضغط الاعصاب وبتساعدك علي التركيز والانتباه
Mohammad Ashraf
Mai Osama